علامة استفهام وربنا يستر ومتقلبش عندنا علامة تعجب

كتير ف حياتنا بنقابل علامات استفهام


كان ليا واحدة صاحبتي بتقوللي انها فضلت عاملة زي علامة استفهام ولما ملقتش اجابة على أسئلة كتير اتقلب وبقت علامة تعجب




أنا النهاردة هسأل أسئلة بسيطة أوي وسهلة




وكمان هسألها بطريقة مباشرة جداً




رغم اني فكرت ف اسم للموضوع النهاردة وكنت محتار أسميه علامة استفهام؟؟ ولا اسميه حالة فضفضة؟؟




ودي برضه علامات استفهام كانت أدامي النهاردة











إيه أول سؤال بييجي على بالك أول ما تصحى م النوم؟





امتى آخر مرة حسيت بسعادة جوه قلبك؟





اتعاملت مع السعادة دي ازاي؟ وكان ايه سببها؟





امتى آخر مرة سببت لحد من اللي حواليك سعادة؟





ازاي قدرت تعمل كده ؟





امتى آخر مرة دخلت الحزن على حد من اللي حواليك؟





ايه اللي سبب ده ؟ وعرفت ازاي؟ واتصرفت ازاي بعدها؟





امتى آخر مرة حسيت إنك حزين؟





ايه السبب اللي خلاك حزين؟ ودرجة الحزن كانت ازاي؟





طلعت من الحزن ده ولا لسه ؟





بتحلم بإيه ف حياتك ؟





شايف نفسك ازاي بعد كام سنة ؟





امتى آخر مرة عينيك دمعت ف خلوة مع ربنا؟





امتى آخر مرة حسيت بطعم الايمان جوه قلبك ؟





شايف نفسك إزاي عند ربنا ؟ ( ده اختياري ممكن تجاوبه او لا وممكن بينك وبين نفسك )